മഹാകവി .പി.കുഞ്ഞിരാമൻ നായർ 1906 ഒക്ടോബർ 25, തിരുവോണം നക്ഷത്രം, ദക്ഷിണേന്ത്യൻ സംസ്ഥാനമായ കേരളത്തിലെ കാസർഗോഡ് ജില്ലയിലെ കാഞ്ഞങ്ങാടിനടുത്തുള്ള വെള്ളിക്കോത്ത് എന്ന സ്ഥലത്ത് സംസ്കൃതപണ്ഡിതനും ,വൈദ്യനും, വേദാന്തിയുമായ പുറവങ്കര കുഞ്ഞമ്പു നായരുടെയും ഭാര്യ പനയന്തട്ട കുഞ്ഞമ്മ അമ്മയുടെയും മകനായി ജനിച്ചു. പട്ടാമ്പിയിൽ പുന്നശ്ശേരി നമ്പി ശ്രീ .നീലകണ്ഠ ശർമ്മ നടത്തിയിരുന്ന ജനകീയ ഗുരുകുലത്തിൽ (ഇന്നത്തെ ശ്രീ നീലകണ്ഠ ഗവ.സംസ്കൃത കോളേജ് ,പട്ടാമ്പി) സംസ്‌കൃതം പഠിക്കുന്നതിന് മുമ്പ് പരമ്പരാഗത അധ്യാപകരോടൊപ്പവും, പ്രാദേശിക പ്രൈമറി സ്‌കൂളിലുമായിരുന്നു അദ്ദേഹത്തിന്റെ പ്രാഥമിക വിദ്യാഭ്യാസം. ഏറെ തെറ്റിദ്ധരിക്കപ്പെട്ട വ്യക്തിത്വമായിരുന്നു മഹാകവി .ശ്രീ.പി.കുഞ്ഞിരാമൻ നായരുടേത്. പക്ഷേ കവിയ്ക്കൊപ്പം നടന്നവരും, കൂടെ ജീവിച്ചവരും, കവിയെ നന്നായി മനസ്സിലാക്കിയവരും- ഈ ചാർത്തിക്കൊടുത്തവയൊക്കെ അപവാദങ്ങൾ മാത്രമാണെന്ന് സാക്ഷ്യപ്പെടുത്തിയിട്ടുണ്ട്. കുടുംബം എന്ന വ്യവസ്ഥിതിയുടെ ചട്ടക്കൂടിൽ ഒതുങ്ങിക്കൂടാൻ പി.ഇഷ്ടപ്പെട്ടില്ല. അതിനോട് പ്രത്യേകിച്ച് ഒരാഭിമുഖ്യവുമുണ്ടായിരുന്നില്ല എന്ന് വേണം പറയാൻ . അതേ സമയം കുടുംബം എന്ന സങ്കല്പത്തിന് ഏറെ പ്രാധാന്യം കൊടുത്തിരുന്നുതാനും. അതിൽ നിന്ന് വ്യതിചലിച്ചപ്പോഴെല്ലാം ഒരു തരം ആത്മനിന്ദ അനുഭവിക്കുകയായിരുന്നു കവി. പി.യുടെ പല സൃഷ്ടികളിലും ഇത് പ്രതിഫലിച്ചു കാണാം. പി. കവിതകൾ എഴുതാൻ തുടങ്ങിയത് പട്ടാമ്പി പഠന കാലത്താണ്. ഗുരുനാഥൻ പുന്നശ്ശേരി നമ്പിയുടെ കാര്യസ്ഥനായിരുന്ന അച്ചുവത്ത് രാമൻ മൂസ്സതിൻറെയും പൊന്മള വടയക്കളത്തിൽ കല്യാണി അമ്മയുടെയും രണ്ടാമത്തെ മകളായ കുഞ്ഞിലക്ഷ്മിയുമായി പ്രണയത്തിലായതും പുന്നശ്ശേരി നമ്പിയുടെ ഗുരുകുലത്തിൽ വെച്ചാണ്. തുടർന്ന്, സംസ്‌കൃതവും വേദാന്ത പഠനവും തുടരുന്നതിനായി അദ്ദേഹം തഞ്ചാവൂരിലേക്ക് താമസം മാറ്റി . പ്രണയത്തെ കുറിച്ചറിഞ്ഞ അഛൻ സ്വന്തം മരുമകൾ പുറവങ്കര ജാനകിയുമായി മകൻറെ വിവാഹം നിശ്ചയിച്ചു .ആഭരണവും മറ്റും വാങ്ങാനേല്പിച്ച 500 രൂപയുമായി നാടുവിട്ട കുഞ്ഞിരാമൻ തൻ്റെ പ്രണയിനിയായ കുഞ്ഞിലക്ഷ്മിയെ വിവാഹം ചെയ്തു. വിവാഹശേഷം കുറേക്കാലം പാലക്കാട് ഒരു പ്രസ്സിൽ ജോലി ചെയ്തു . അവിടെ വെച്ചായിരുന്നു കുഞ്ഞു ലക്ഷ്മിയുടെ കടിഞ്ഞൂൽ പ്രസവം .കുമാരനാശാൻറെ 'ലീല'യെ അനുസ്മരിച്ച് കവി മകൾക്ക് ലീല എന്നാണ് പേരിട്ടത്. പിന്നെ കുറെ നാൾ പൊന്മള വടയക്കളം തറവാട്ടിൽ. അവിടെ വെച്ചാണ് മകൻ പിറക്കുന്നത്. ടാഗോറിൻറെ സ്മരണയിൽ രവീന്ദ്രനാഥ് എന്ന് കവി തന്നെ നാമകരണം ചെയ്തു. പിന്നീട് സകുടുംബം കണ്ണൂരിൽ . കണ്ണൂരിൽ നിന്ന് പ്രസിദ്ധീകരിക്കുന്ന നവജീവൻ പത്രം സ്ഥാപിച്ചെങ്കിലും പ്രസിദ്ധീകരണം ഇല്ലാതായതോടെ തൃശ്ശൂരിലെ സരസ്വതി പ്രസ്സിലും ഒലവക്കോട് ശ്രീരാമകൃഷ്ണോദയം പ്രസ്സിലും ജോലി ചെയ്തു. പിന്നീട് കുഞ്ഞി ലക്ഷ്മിയെയും മക്കളെയും കൂട്ടി കാഞ്ഞങ്ങാട് മoത്തിൽ വളപ്പിൽ താമസമാക്കി .. അഛൻറെ മരണശേഷം കുറേക്കാലം വീട്ടുകാര്യങ്ങൾ നോക്കി നടത്തി. അക്കാലത്ത് കൂടാളി ഹൈസ്കൂളിൽ മലയാളം അധ്യാപകനായിരുന്നു.. ഏതാണ്ട് 10 വർഷത്തോളം കുഞ്ഞി ലക്ഷ്മിയമ്മയ്ക്കും മക്കൾക്കു മൊപ്പം കൂടാളിയിൽ .അതിന് ശേഷം കൊല്ലങ്കോട് രാജാസ് ഹൈസ്ക്കൂളിൽ നിന്ന് വിരമിച്ചു. കുത്തമ്പുള്ളിക്കടുത്ത കണിയാർകോട്ടെ മുല്ലത്തൊടി തറവാട്ടിലെ കാർത്യായനി അമ്മ (ചിന്നമണി )യിൽ രണ്ടു കുട്ടികളും കൂടിയുണ്ടായിരുന്നു കവിയ്ക്ക് .തൃശ്ശൂരിൽ തിരുവമ്പാടി ക്ഷേത്രത്തിനടുത്ത് പി.യുടെ കൂടെ ഒരു വാടക വീട്ടിലായിരുന്നു താമസം.കാർത്യായനിയമ്മയുടെ മരണശേഷം കുട്ടികളേയും കൂട്ടി കവി കാഞ്ഞങ്ങാട്ടെ വീട്ടിലേക്ക് പോയി. ഒരു കുട്ടി നന്നേ ചെറുപ്പത്തിൽ മരിച്ചു. മറ്റൊരു മകൾ രാധ ജീവിച്ചിരിപ്പുണ്ട്.ലക്കിടിയിലെ പാറുക്കുട്ടി ടീച്ചറുമായുള്ള ബന്ധത്തിൽ ബാലാമണി എന്നൊരു മകൾ കൂടിയുണ്ട്. 1978. മേയ് 27 ന് എഴുപത്തിരണ്ടാം വയസ്സിൽ തിരുവനന്തപുരത്തെ സി.പി.സത്രത്തിൽ(ഇന്നതില്ല) വെച്ച് അന്തരിച്ചു. മക്കൾ - ലീല ,രവി, രാധ,ബാലാമണി. ദക്ഷിണേന്ത്യയിലെ തന്റെ ജന്മനാടായ കേരളത്തിന്റെ പ്രകൃതിസൗന്ദര്യവും, തന്റെ ജീവിതത്തിന്റെ യാഥാർത്ഥ്യങ്ങളും വിശദമായി പ്രതിപാദിക്കുന്ന റൊമാന്റിക് കവിതകൾക്ക് അദ്ദേഹം പ്രസിദ്ധനായിരുന്നു. 1959-ൽ കവിതയ്ക്കുള്ള പ്രഥമ കേരള സാഹിത്യ അക്കാദമി അവാർഡ് അദ്ദേഹത്തിന് ലഭിച്ചു. കേന്ദ്രസാഹിത്യ അക്കാദമി അവാർഡും അദ്ദേഹം നേടിയിട്ടുണ്ട്. നീലേശ്വരം രാജാവ് പി.യ്ക്ക് ഭക്തകവി പട്ടം നൽകി ആദരിക്കുകയും 1949-ൽ വീരശൃംഖല (സ്വർണ്ണ വള) സമ്മാനിക്കുകയും ചെയ്തു. കേരള സാഹിത്യ അക്കാദമി 1959-ലെ കവിതയ്ക്കുള്ള പ്രഥമ കേരള സാഹിത്യ അക്കാദമി അവാർഡിന് കുഞ്ഞിരാമൻ നായരുടെ 'കളിയഛൻ' തിരഞ്ഞെടുക്കപ്പെട്ടു. 1967-ൽ താമരത്തോണി എന്ന കൃതിക്ക് കേന്ദ്ര സാഹിത്യ അക്കാദമി അവാർഡ് ലഭിച്ചു. ബൊഹീമിയൻ ജീവിതശൈലി (നാടോടി )യാണ് കവി ഇഷ്ടപ്പെട്ടിരുന്നതെന്ന് വേണമെങ്കിൽ പറയാം.കേരളത്തിൽ ഉടനീളം അലഞ്ഞുതിരിഞ്ഞു, പല സ്ഥലങ്ങളിൽ താമസിച്ചു, അവരുടെ ആളുകളെ കണ്ടുമുട്ടുകയും അവരെ തന്റെ ജീവിതത്തിന്റെയും സാഹിത്യത്തിന്റെയും ഭാഗമാക്കുകയും ചെയ്തു. കഥകൾ, ലേഖനങ്ങൾ, നാടകങ്ങൾ എന്നിവ അദ്ദേഹം എഴുതിയിട്ടുണ്ടെങ്കിലും കവിതയാണ് അദ്ദേഹത്തിന്റെ പ്രധാന രചനാരീതി രൂപപ്പെടുത്തിയത്.